Mtazamo wa John Kitime katika muziki 2012!!!!!!!

Mwaka 2012 ndio huoo umetokomea, ni vizuri kuangalia yaliyopita ili kujitayarisha na yajayo. Muziki wa nchi yetu ulitawaliwa na muziki wa Bongoflava, Taarab, muziki wa bendi, matarumbeta, muziki wa Enjili, na muziki wa kiasili. Si siri kuwa muziki wa Bongoflava ndio uliokuwa ukitawala katika vyombo vya habari na sehemu nyingi za maonyesho ukifuatiliwa na muziki wa Taarab na muziki wa enjili.  Katika muziki wote huu jambo lililokuwa wazi ni kuwa waimbaji ndio waliokuwa wakipewa kipaumbele katika tasnia hii.  Waimbaji katika aina zote za muziki uliotajwa hapo juu ndio waliotajwa na kupewa sifa kwa ubora wa muziki. Kumekuweko na mashindano kadhaa ambayo yote yamejikita katika kutafuta vipawa vya waimbaji japo mara nyingi yamejitambulisha kama mashindano ya kusaka vipaji mbalimbali. Hakuna ubishi muziki wa dansi na muziki wa asili ndio muziki uliopewa muda mchache sana katika vyombo vya habari. Na hata katika muziki huo, bendi ambazo zimejikita kufuata mipigo ya Kikongo vilipewa nafasi zaidi ya bendi ambazo zimejichagulia njia nyingine za muziki wao.

Kuna sababu kadhaa ambazo zimefanya muziki wa bongoflava kuchukua nafasi zaidi katika vyombo vya habari, la kwanza ni uwingi wa kazi za bongoflava zinazorekodiwa. Karibu kila mji una studio ya aina moja au nyingine, na katika studio hizo kazi nyingi zaidi zinazorekodiwa ni aina hiyo ya muziki, hivyo kutokana na uwingi wa kazi hizo ni wazi kabisa ndizo ambazo zitaendelea kutawala anga la vyombo vya habari, na pia ni kutokana na mfumo wa vyombo vyetu vyote kujikita katika mfumo wa aina fulani tu za muziki.

Kwa mtizamo wangu heka heka za muziki wa Enjili zilipungua 2012. Yale matamasha makubwa ya muziki huo yalipungua sana, na hata nyimbo za kushtua jamii hazikuwa nyingi  kama ilivyokuwa miaka ya nyuma.

Muziki wa Taarab haujaleta mabadiliko kimuziki, mengi yaliyofanywa katika 2012 ni marudio tu ya ubunifu uliofanyika nyuma. Kama vile uanzishwaji wa kucheza show katika taarab, upigaji wa gitaa na kuliachia pekee yake kama ilivyokuwa kwa bendi kuachia gitaa la rhythm miaka kabla ya tisini na zile video za kucheza mbele za viwanja vya hoteli. Kumekuweko tu ubunifu wa misemo na mipasho, jambo tena ambalo limesababisha kuenziwa zaidi kwa waimbaji tu katika fani hiyo pia.

Bendi ziko katika wakati mgumu, wakati wanamuziki wengi wa bendi wakilalamika kuwa muziki wa bendi haupigwi, kumekuweko na jitihada ndogo za bendi kurekodi nyimbo mpya, maelezo mengi yamekuwa ni kuhadithia enzi ambapo muziki wa bendi ulitawala na kuona kama hiyo ni sababu tosha ya muziki huo kurushwa hewani. Bendi chache zilizorekodi hazijaja na  nyimbo zilizoweza kuteka umma wa wa Tanzania na hivyo kusababisha muziki huu kukosekana katika anga za muziki. Matangazo mengi ya muziki wa dansi yamekuwa ni kutangaza rap mpya au kupatikana kwa msanii mpya, lakini kiujumla hakujakuwa na kitu kipya katika muziki wa bendi.

Muziki asili pia umekosekana kwenye vyombo vya habari kwa kuwa si vikundi vingi vya muziki huu vyenye uwezo wa kulipia gharama za studio ambao muziki huu unastahili kurekodiwa. Studio nyingi zimejengwa kwa ajili ya muziki wa aina ya Bongoflava tu, zile studio za kuweza kuruhusu kundi la muziki wa asili kurekodi gharama yake huwa ni kubwa sana. 

Kundi la Makirikiri lilitakiwa kuwa elimu tosha kwa wasanii wa muziki wa Kiasili, kuwa na muziki huo ukifuata taratibu nzuri ya kurekodiwa unauza vizuri sana, bahati mbaya kuna vikundi sasa vimeacha muziki na ngoma zao, vinaiga uchezaji wa  Makirikiri.

Pengine watu watasema nimesahau muziki wa kwaya, sijausahau, kwa kweli muziki huu umebaki  hasa kwenye muziki wa Enjili. Hapo zamani ulikuwa ukitumika sana kwenye siasa na kampeni , lakini kwa mwaka 2012 hali imekuwa mbaya kwa muziki huu.

Pamoja na kuwa wengine wangeweza kusema tunasonga mbele katika muziki, kwangu mimi naona tunarudi nyuma kitaaluma. Tasnia inaingiza pesa nyingi zaidi, na hata kuna wasanii walioingiza pesa nyingi sana, lakini  kwangu hilo si kipimo cha maendeleo katika tasnia hii.

Kama nilivyoanza kusema washika maikrofon wamekuwa ndio alama ya muziki wa Tanzania. Muziki ni zaidi ya kuimba. Katika kuimba sauti nzuri ya muimbaji ni muhimu, na ninashukuru kwa hilo tunao waimbaji wazuri wengi sana, lakini  ule muziki unaomsindikiza muimbaji ni muhimu sana kwani ule hauna mipaka wala lugha, na ndio unaoweza kutufungulia mlango wa soko la kimataifa. Wengi tunapenda sana muziki wa kutoka Kongo, Nigeria, South Africa, pamoja na kuwa hatujui hata moja wanaloliongelea tunaupenda muziki huo kutokana na mpangilio wa vyombo vyao. Kutokujali wapigaji katika mfumo wa nchi yetu ndio unatupelekea kuwa watu wa ‘copy and paste’ wa upigaji wa muziki wa nchi nyingine. Ukiorodhesha nyimbo zote zilizotikisa nchi hii kwa mwaka 2012 utagundua asilimia kubwa ya muziki uliotumika ulikuwa ni wa kunakili kutoka muziki wa nchi nyingine, Nigeria, Congo na Afrika Kusini ndio wamekuwa waalimu wetu wakuu. Ushauri kwa maproducer wa Bongoflava, kuangalia pia muziki wetu wa asili humu ndani ya nchi ili tuje tumalize 2013 na kitu chetu ambacho Wanaigeria, Wakongo nao pia waige toka kwetu. Inawezekana sana maana wimbo wa Weekend wa Afro70 uliwahi kuweko katika  kumi bora 1972, Nigeria.

Muziki wa Enjili pamoja na kuwa ndio unaotegemewa kutufundisha maadili, ulikuwa na kasoro moja kubwa nayo ni kukosa maadili kwa kucopy na kupaste. Nyimbo nyingi zilizokuwa maarufu na kuteka hisia za maelfu ya watu zilikuwa ni kuiga moja kwamoja kutoka Afrika ya kusini. Najiuliza je ndio kilichopunguza moto wa muziki huu 2012? Kulikuwa hakuna za kukopi? Wanamuziki wa Enjili kama ilivyo kwa ushauri kuhusu Bongoflava, ni muda wa kurudi nyuma na kutumia raslimali ya utamaduni iliyoko kuleta mabadiliko na kukuza soko la muziki huo.

Tasnia ya muuziki wa Tanzania katika tafiti moja wapo umeitwa ‘the radio-driven contemporary music industry’. Kwa maneno rahisi, tasnia ambayo imekuwa inaendeshwa na radio. Radio zimekuwa na uwezo wa kumpandisha na kumshusha mwanamuziki, kumtafutia soko, kumzibia soko na kadhalika. Hali hii ikisindikizwa na rushwa ambayo imetapakaa katika jamii yetu, unapata picha kuwa kungeweza kukawa na sura bora au tofauti ya muziki hali isingekuwa ilivyo. Kuna ripoti za watu kutoa hongo nyimbo za wenzao zisipigwe, hongo ili nyimbo zipigwe, visasi vya kuzuia nyimbo zisipigwe na kadhalika. Na katika jamii ambayo imekuwa na kawaida ya kutegemea vyombo vya habari kujua muziki gani mpya na mzuri, uwanja huu si uwanja ulio tambarare hata kidogo. Bahati mbaya inaonekana wenye vyombo hivi wako mbali na ukweli unaoendelea katika vyombo vyao au kwa kutokujua au kupuuza. Janga hili limevikumba hata vyombo ambavyo vinaendeshwa na taasisi za dini. Wanamuziki wa muziki wa Enjili nao pia wanalia kudaiwa rushwa na watangazaji wa radio za Enjili!.  Nakumbuka siku niliyopata nafasi kuongea na kiongozi mmoja wa dini ambaye Kanisa lake linaendesha kituo cha radio, nilipata mshangao baada mkuu huyo, kuanza kutetea watangazaji wake badala ya kuamua kufanya uchunguzi wa tuhuma.

Umefika muda wa radio kuanza kujigawa kimuziki. Ni kichekesho mji kuwa na vituo vya radio 30 halafu vyote vinapiga aina hiyohiyo ya muziki, wakati kuna aina mbalimbali za watu. Ajabu ni kuwa wenye radio wanajua kuwa katika nchi nyingine unaweza kukuta radio iliyoamua kupiga aina fulani tu ya muziki, Jazz Radio, Country music Radio, Classic Music Radio, lakini hilo limekuwa gumu kwao kutekeleza hapa. Kuwe na utofauti, Wasikilizaji tuko wa aina tofauti.

Vyombo vya habari viijitahidi kupata wataalamu husika wa aina tofauti za muziki, muziki unaviingizia vyombo hivyo mabilioni ya fedha, vyombo vya habari  viupe heshima yake. Bila muziki hakuna radio.

Magazeti yamekuwa mstari wa mbele katika kutangaza aina mbalimbali za wasanii na sanaa. Pamoja na hongera kwa kazi nzuri lakini bado kuna nafasi kubwa ipo tupu, hakuna wataalamu wa uandishi wa habari za muziki. Hivyo habari nyingi za muziki zinaandikwa na waandishi kama wapenzi wa muziki na si wataalam wa uandishi wa muziki, jambo ambalo liko tofauti na uandishi wa michezo kwa mfano soka. Unaweza ukasoma habari ya soka ambapo mwandish atakueleza nafasi za wachezaji, kama ni faulo, ni nini kilisababisha, na kama ni goli lilikuwa ni la kichwa au kona au penalty, hili haliko katika muziki. Utaambiwa tu  bendi ilipagawisha, au msanii fulani ateka nyoyo za wapenzi, na maelezo ya juu juu kama yale, kunahitajika kuanzishwa mafunzo ya elimu ya uandishi wa kazi za sanaa. Hili litapunguza hata vurugu kama zilizotawala  mwaka huu ya wapiga picha kufikia hata kulala chini ili tu wapate picha ya nguo za ndani za msanii na hayo ndio kuwa maelezo makuu ya onyesho zima la  muziki.

Ikiwa kulikuwa na mchango wa serikali katika muziki, basi ulikuwa mdogo au ulikuwa ni kwa shughuli maalumu lakini si kwa kutengeneza mazingira ya kuwezesha unafuu kwa wanamuziki kwa ujumla. Idara ya Utamaduni imeendelea kupata bajeti ndogo ambayo imefanya Baraza La Sanaa La Taifa kuendelea kubaki Dar es Salaam tu, likibangaiza kuweko kwa kutegemea kutoa vibali mbalimbali kwa wasanii, na nguvu zake kuonekana Dar es Salaam tu. Na kwa kuwa hakuna Maafisa Utamaduni Mkoa, na Maafisa Utamaduni Wilaya na Manispaa wako chini ya serikali za mitaa hivyo kuwa wizara tofauti na Waziri wa Utamaduni, nguvu za serikali katika utamaduni ni 0. COSOTA chombo ambacho shughuli yake ilikuwa ni kulinda hakimiliki za wasanii na ambacho kilikuwa chini ya wasanii, kwa kinyemela kabisa kimerudishwa katika mikono ya serikali, lakini bado kinakusanya mirabaha 'kwa niaba ya wasanii' huku kukiwa na bodi isiyo na uwakilishi wa wasanii kuanzia 2007. Swali utakusanyaje pesa kwa iaba yangu lakini huniruhusu kujua ni kiasi gani umekusanya, unazitumiaje na ukiulizwa unakuwa mkali!!!!!!? Kuna wasanii wamekuwa wakidai kurudishiwa COSOTA, ushauri wangu wasanii wakae wajipange  na kuelewa vizuri sheria ya Hakimiliki kabla ya kujitwishwa zigo hilo la miba.

Katika miezi 6 ya mwisho ya 2012 kumejitokeza spidi kali ya Mamlaka ya Ukusanyaji wa Mapato kutengeneza mazingira ya kukusanya mapato kutokana na mauzo ya kazi za muziki na filamu. Kimsingi kulipa kodi ni wajibu wa kila mwananchi na wasanii ni wananchi pia, lakini taratibu zake ndio zinanipa utata, hasa pale ambapo kwa muda mrefu imekuwa ikitangazwa kuwa njia hii itasaidia wasanii kwa kupunguza kuibiwa.  Sentensi hii inaonyesha wazi anaeiongelea aidha hajui mfumo wa biashara ya kazi muziki, au kwa makusudi anapotosha ili kuficha kitu. Wasanii wengi huwa wamekwishalipwa kwa kazi ambazo zimesambaa na ziko barabarani zinaibiwa, wanaoibiwa ni wasambazaji. Hivyo kulinda kazi hizo unamlinda msambazaji si msanii. Pia kuanza kukusanya kodi kwa kazi hizi kumepewa jina ‘kurasmishwa  kwa kazi ya usanii’, kuna mabilioni wasanii wanatakiwa walipwe na watumiaji wa kazi za sanaa, kama radio na TV, mapromota, waajiri na kadhalika  hakuna anaeliongelea hilo wala hakuna anaetamka takwimu hizo. Kuna kazi ya kurudisha mitaala ya masomo ya sanaa mashuleni, kurudisha vyuo vya walimu wa sanaa, kurudisha maafisa utamaduni kuwa chini ya Wizara ya Utamaduni kuwawezesha kufanya kazi zao kadri ya sera ya Utamaduni, na mengine mengi ya aina hiyo ndio ningeona kurasimisha kazi za sanaa, lakini kukusanya kodi tu kwa kazi ambazo hata hivyo mikataba yake mingi inautata na kuita urasimishaji si sahihi. 

Katika nchi nyingi critics au watu ninaoweza kuwaita kiswahili wakosoaji, huwa ni muhimu katika maendeleo ya sanaa, watu hawa hupata heshima kutokana na kuweza kuangalia mapungufu katika kazi za sanaa na kuyasema, jambo ambalo hupelekea wasanii kujirekibisha na kutengeneza kazi bora zaidi. Hapa kwetu kutoa ushauri ni kutafuta matusi, toka kwa wasanii wenye kazi husika, vyombo vya habari na hata sehemu ya jamii, umefika muda wahusika kuchukua uchambuzi kama changa moto za kuboresha kazi.

Niliyoyataja hapa yote yako wazi ninachotegemea ni kuona 2013, hatua zinaanza kupigwa kurekibisha, ili wanamuziki wa nchi hii nao wapate nafasi sawa na wengine wa nchi nyingine.

John Kitime

31.12.2012

Sinza, Dar es Salaam 

      "Swahili Na Waswahili" Pamoja Sana.

Shukrani Zangu na Nawatakia mwisho wa Mwaka,Uwe Mwema na Mwanzo Mzuri kwa Mwaka Ujao;Burudani-Sarah K - Niinue (Mbele Ninaendelea)na Nyingine Nyingi!!!!!!

Namshukuru sana MUNGU kwa yote katika mwaka huu,Yeye ni kila kitu Maishani mwangu.....
Neno;Zaburi:111;1-10;Kumcha BWANA ndio mwanzo wa hekima,Wote wafanyao hayo wana akili njema,Sifa zake zakaa milele!!!!.

Nawashukuru Familia Yangu,Ndugu,Jamaa,Marafiki,Ma-blogger,Wapenzi/Wasomaji/Wafuatiliaji[Wapendwa/Waungwana]wa Swahili NA Waswahili  na Mitindo Afrika .Wote wanaonifahamu kwa Namna moja au Nyingine.

Nikutake Radhi/kukuomba Msamaha wewe niliyekukosea/kukukwaza kwa namna yoyote ile,Haikuwa kusudi langu kusababisha hayo ni Hali ya Kibinadamu tuu.Nami nichukue anafasi hiiKusamehe/ kusahau Makwazo, Mapito yote ni Changamoto za kimaisha na Tuanze Upya

.MUNGU azidi kukubariki wewe unayesoma hapa na Wengine woteee!!!!

"Swahili NA Waswahili"MUNGU atubariki Sote na Pamoja Daima.

S n W

Jikoni Leo,Afya na Jamii; Na Kaka John Haule-Jinsi ya kutengeneza maziwa ya soya.

Jinsi ya kutengeneza maziwa ya soya.

Baba karudi ni makala fupi fupi ambazo zitakuwa zinatoa mwanga kwa jamii kujifanyia mambo yahusuyo afya na maisha bora kwa ujumla wa ustawi wa jamii ya watanzania kila wiki katika uwanja huu. Lakini la kufurahisha zaidi ni kuwa, hata kama unakusudia kufanya kitu Fulani lakini hujui namna ya kufanya basi kutakuwa na fursa kwako msomaji kutuletea maswali ambayo naahidi yatajibiwa yote ili kuharakisha maendeleo ya Taifa letu. Uwanja huu utaitwa “Baba Karudi” ukiwa na maana nitakuwa natoa kile nilichopata katika safari zangu duniani kote ambako shughuli yangu kubwa ni kukutana na wataalamu wa mambo mbali mbali na kufanya mahojiano nao halafu nakuja kuwaletea watanzania wangu hapa vile vile nitakuwa nayapeleka maswali yenu wasomaji juu ya yale mnayotaka kuyafanya lakini hamjui yanafanywaje.. Nakuomba usiende mbali.

Leo nimekutana na Bi Carole Bruzzano toka www.eHow.com. Nimefunga safari kuja Canada kupata ukweli juu ya Soya kuwa maziwa safi na bora kwa afya za walaji. Yeye anasema:

Soya inatumika duniani kote katika mapishi mengi mbalimbali ikiwemo kutengeneza maziwa na kuungia kitoweo kama nyama na samaki au kama mbadala wa vitoweo hivyo kiafya kwa mlaji.

Anasema kutengeneza maziwa ya unga ya soya ni kazi ndogo sana ambayo inaweza kukugharimu kama dakika 60 tu. Wenye viwanda vikubwa hupitia hatua nyingi kutengeneza maziwa hayo ya unga ya soya. Lakini wewe unaweza tu ukatengeneza mwenyewe nyumbani kwako tena kwa kutumia vifaa rahisi vinavyopatikana bila kuazima kwa jirani.

Wewe unatakiwa uanze na kuzisafisha soya kwanza, halafu weka juani zinyauke kidogo ili ngozi ya soya ilegee na kasha umenye ngozi zote, uoshe tena na uzikaushe mpaka zikauke kau! Hapo tayari utakuwa umeshaandaa soya kusagwa na kuwa maziwa ya unga tayari kupeleka mahotelini na majumbani kwa matumizi.

Bi Carole anasema unahitaji kuwa na vifaa hivi:

1.     Lazima uwe na kikaango ili uzikaange soya zako kabla ya kusagwa.

2.     Unatakiwa pia uwe na blenda au kinu cha kutwangia na chekecheke ili soya iwe unga laini sana

3.     Mwisho tayarisha vikombe viwili au vitatu vya soya

4.     Maziwa halisi japo nusu kikombe kwa ladha na harufu.

Kaanga soya yako katika kikaango angalia zisiungue.zikaange kwa dakika 10 hadi 15 na utaona kuwa zimeiva kwa kubadilika rangi na kuwa kahawia basi ipua na ziache zipoe kidogo kabla ya kuanza kuzisaga.

Saga soya zako, chekecha mpaka upate unga laini sana, ukimaliza weka katika chombo kikavu na kisafi. Sasa chukua maziwa HALISI nusu kikombe na tia katika soya halafu changanya na anika mpaka mchangavyiko huo umekauka.

Mwisho utaona unga umekauka lakini bado una madonge. Yapukuchue kwa mikono safi  halafu tia soya katika mkebe safi tayari kwa matumizi kama maziwa halisi.

Faida za Maziwa ya soya

Unaweza kuanzisha biashara ya kuuza maziwa kama wewe ni mama ntilie au una hoteli au aina zingine za biashara ya vyakula na ukapata faida kubwa bila kuwa na wasiwasi wa kupata hasara.

Maziwa ya soya ni mazuri ukilinganisha nay a wanyama kwa kuwa hayana sukari asilia iitwayo Lacoste ambayo sio nzuri kwa afya hivyo wenye aleji na maziwa ya kawaida basi ndio muda wao wa kujidai na maziwa haya.

Maziwa ya soya yana protini karibu sawa kabisa na ya wanyama lakini haya yana protini ya mimea tofauti na ile ya wanyama ambayo si nzuri kwa afya. Protini ya mimea ni nzuri mwilini kwa kuzuia upotevu wa calsiam kwenye mkojo na kukusaidia usipatwe na magonjwa ya maumivu ya mifupa. Wenye kisukari ndio maziwa yao haswa.

Maziwa ya soya hayana mafuta yenye sumu (saturated fats) wala lehemu. Hivyo ni maziwa yanayowafaa wagonjwa wenye maradhi ya moyo sana.

Maziwa haya bado Bi Carole anadai kuwa ni kinyonya sumu mwilini kijulikanacho kama “isoflavones” ambacho huzuia uzee wa kizembe, maraghi ya mifupa na kansa za aina nyingi mwilini.

Mtu akinywa kikombe kimoja cha maziwa ya soya basi ajue kuwa ana 20%ya isoflvones ambayo katika maziwa ya wanyama hamna!

Hivyo leo tunaishia hapa kwa kuwaasa kujitengenezea maziwa ya soya badala ya kuharibu pesa ambayo ni ngumu sana hasa kwa kipindi hiki. Lakini pia tumefungua rasmi ukurasa ambao tutautumia wasomaji kuuliza namna ya kufanya jambo lolote ulitakalo. Wiki ijayo nitakuja na “JINSI YA KUJITENGENEZEA SODA YOYOTE” au kwa lugha ya wataalamu ni “how to carbonated drinks” ambayo itatusaidia kupunguza manunuzi ya soda kipindi hiki cha jua kali na pia tutaongelea faida na hasara za kunywa soda pia.

Asanteni kwa kunisoma na tuonane juma lijalo.

John Haule ni mpelelezi binafsi (Private investigator) anayejihusisha na tafiti zenye suluhisho kwa matatizo ya kijamii. Unaweza kumpigia kwa miadi ya ushauri juu ya tatizo lolote linalokusumbua kibinadamu. Anapatikana Car Painters - Temeke Stereo, Sandawe Street, jirani na Dr. Massawe. Simu: 0768 215 956 au email rumoursafrica@gmail.com

        "Swahili NA Waswahili" Pamoja Sana.

Mfululizo wa Mahojiano ya Wadau wa Filamu na Muziki;147 Critics:John F Kitime (2)!!!

 Muendelezo wa 147 Critics ambapo leo tunamsikiliza mdau muhimu na makini kwenye Muziki wa Dansi na kwa 
upande mwingine kwenye Filamu akielezea kuhusiana na marekebisho ya sheria ya ushuru wa bidhaa Sura 147 
yanayogusa Muziki na Filamu.

Tusikilize 147 Critics:John F Kitime (2)  akiwa ni mtu wa pili kuelezea maoni yake.

Msikilize vyema John F Kitime uweze kufahamu vyema yale anayoyajuwa na anayodhani ni muhimu kuwa sawa katika mabadiliko ya sheria hii!






Mahojiano haya na Ndg John F Kitime yametokana na
-C. Sheria ya Ushuru wa Bidhaa, SURA 147
Serikali kupitia Mamlaka ya Mapato itaanza
kurasimisha biashara ya bidhaa za muziki na filamu kwa
nia ya kuhakikisha kwamba uasili wake unatambulika na
hivyo kuzuia vitendo vya kudurufu kazi za sanaa (piracy of
artists work) hali ambayo inadumaza ukuaji wa sanaa na
vipaji hapa nchini. Aidha, Mamlaka ya Mapato itaweka
stampu kwenye bidhaa hizo ili uuzaji wa kazi hizo uwe
rasmi na kuwawezesha wasanii kupata kipato stahili
kutokana na kazi zao. Vilevile hatua hii itaiingizia serikalimapato.

kwa Maelezo zaidi ingia;TheImageProfession 

"Swahili NA Waswahili" Pamoja Sana.

Nawatakia Kheri na Baraka;Christmas Njema!!!!!!!

Wapendwa/Waungwana,Ndugu,Jamaa na Marafiki;
Nawatakia  Christmas Njema,Kheri,Baraka,Amani,Upendo,Furaha,Umoja,Fadhili,Shukrani,Msamaha na Upole Kiasi.
MUNGU awe Nanyi/Nasi Daima!!!!

"Swahili NA Waswahili" Tunawapenda Woooote.

Jikoni Leo;Tupike Pamoja-Recipe of Chicken Wings with Homemade Barbecue sauce - Mapishi ya (In Sw...!!!!!!

This is a video showing how to cook Chicken wings with Homemade Barbecue sauce, for East-African users and all the swahili speakers all around the world. It's also subtituled in English. Please, subscribe to our channel if you like it. We are working to offer you more video-recipes in swahili, in our Youtube channel and in our web-site www.tupikepamoja.com

Mmmmhhhhh Tamu Saaaana.

                "Swahili NA Waswahili" Pamoja Saaaana

Nawatakia J'Pili Njema na Maandalizi Mema ya Christmas na Mwaka Mpya;Burudani-Upendo Group Kijitonyama - Hallelujah Tunaimba na Nyingine Nyingi!!!!!!

Wapendwa;Nawatakia J'Pili Njema,Upendo,Baraka,Amani na Maandalizi Mema ya Christmas na Mwaka Mpya.
Ndugu zangu nawasihi,Waangalieni wale wafanyao fitina na mambo ya kukwaza kinyume cha mafundisho mliyojifunza;Mkajiepushe nao.

Neno La LeoWarumi:16:17-20 Naye  Mchungaji wa Amani atamseta Shetani chini ya Miguu yenu.Neema ya BWANA wetu YESU Kristo na iwe Pamoja nanyi.[AMINA].

                                      "Swahili NA Waswahi" Mbarikiwe Sana.